പുരസ്കാരങ്ങൾ

സാഹിത്യപ്രവർത്തനങ്ങൾക്ക് കേന്ദ്ര സാഹിത്യ അക്കാദമി അവാർഡ്, കേരള സാഹിത്യ അക്കാദമി അവാർഡ് തുടങ്ങി അനേകം  ബഹുമതികളും പുരസ്കാരങ്ങളും വിഷ്ണു നാരായണൻ നമ്പൂതിരിക്ക് ലഭിച്ചിട്ടുണ്ട്.

ആധുനികതയും പാരമ്പര്യവും കൂടിക്കലരുന്ന കവിതകളെന്ന് അറിയപ്പെടുന്ന വിഷ്ണുനാരായണൻ നമ്പൂതിരിക്ക് 1979-ൽ ഭൂമിഗീതങ്ങൾ എന്ന കവിതാ സമാഹാരത്തിന് കവിതയ്ക്കുള്ള കേരള സാഹിത്യ അക്കാദമി അവാർഡ് ലഭിച്ചു. പതിനഞ്ച് വർഷത്തിന് ശേഷം, 1994 ൽ, കേന്ദ്രസാഹിത്യ അക്കാദമി അവാർഡിനായി അദ്ദേഹത്തിന്റെ ഉജ്ജയിനിയിലെ രാപ്പകലുകൾ എന്ന സമാഹാരം തിരഞ്ഞെടുത്തു. അതിനിടയിൽ മുഖമെവിടെ? എന്ന കൃതിക്ക് ഓടക്കുഴൽ അവാർഡ് (1983)ലഭിച്ചു. 1996-ൽ അദ്ദേഹത്തിന് ആശാൻ സ്മാരക കവിതാ പുരസ്കാരം ലഭിച്ചു, 2005-ൽ കേരള സാഹിത്യ അക്കാദമി സമഗ്ര സംഭാവനയ്ക്കുള്ള പുരസ്കാരം നൽകി അദ്ദേഹത്തെ വീണ്ടും ആദരിച്ചു. 2009-ൽ മാതൃഭൂമി സാഹിത്യ അവാർഡ് ലഭിച്ച അദ്ദേഹത്തിന് 2010-ൽ ചാരുലതയ്ക്കുള്ള വയലാർ അവാർഡ്, വള്ളത്തോൾ അവാർഡ് എന്നിങ്ങനെ രണ്ട് അവാർഡുകൾ ലഭിച്ചു.

2014-ൽ ഇന്ത്യാ ഗവൺമെന്റ് അദ്ദേഹത്തെ ഇന്ത്യയിലെ നാലാമത്തെ പരമോന്നത സിവിലിയൻ ബഹുമതിയായ പത്മശ്രീ നൽകി ആദരിച്ചു. അതേ വർഷം തന്നെ കേരള സർക്കാർ അവരുടെ പരമോന്നത സാഹിത്യ പുരസ്‌കാരമായ എഴുത്തച്ഛൻ പുരസ്‌കാരം നൽകി ആദരിച്ചു. ചങ്ങമ്പുഴ അവാർഡ്, ഉള്ളൂർ പുരസ്‌കാരം, പന്തളം കേരളവർമ കവിതാ പുരസ്‌കാരം, ഏറ്റുമാനൂർ സോമദാസൻ സാഹിത്യ പുരസ്‌കാരം, സി.വി.കുഞ്ഞിരാമൻ സാഹിത്യ പുരസ്‌കാരം എന്നിവയാണ് അദ്ദേഹത്തിന് ലഭിച്ച മറ്റ് പുരസ്‌കാരങ്ങൾ.